Der 1. Vorsitzende des "Ortsbürgerverein Wiefelstede e.V.", Edzard Pauly hielt am 21. Juni 2009 in Conneforde die "Feuerrede.

 

Sünnwendfier up dat Jaohr 2009

 

Leewe Lü van wiet un siet, ik begrööt Jo van Harten!

 

De Dage sünd länger wurrn un de Nächte körter! Denn kummt de längste Dag: dat is de Sömmersünnwend! Siet Jaohr un Dag ward disse Dag un disse Nacht fiert!

 

De Minschen överall in’ne Welt hebbt sik siet dusende van Jaohren  över dissen Dag Gedanken makt un dat givt een ganz Reeg van Biespille daför, dat  besünners de Sömmersünnwend in ehr Leven eene grode Rull späält het un bit in use Dag noch jümmers deit. De Sünn weer alltieds de Mitt van ehr Leven: De Sünnwendtied, dat is för us Minschen een bannig hooge Tied un Dag   in’t Jahr. Wi spöördt dat, wenn wi nu övert Land usen Weg gaht un seht, dat dat Koorn riepen deit. 

In disse Tiet weet wi, dat na de Riepde uk bold de Arnte un dat Vergahn kummt, un wi weet uk, dat dat jümmers woller nee Saat un Arnte givt. Dat is de Kring van’n Jahresloop un van dat minschliche Leven. Man wi kiekt liekut un freut us up de tokamen Tiet. Dat is use Art un wi richt us Leven dar na ut.

 Dat is uk een Gelegenheit för us,  över dat een of anner natodenken un för’n Oogenblick innetoholen. De Tiet könnt wi nich anholen, man wi dröft  in den Weltenloop een korte Besinnung nehmen un viellicht uk in us Binnerstes gahn un us frogen, hebbt wi denn uk all recht makt jüst dissen Dag, of disse Week of dat verganen Jaohr. Hebbt wi mit us eegen Frominsch of Mannsminsch  jümmers de rechten Wöör funnen? Is de Leevde nich to köört kamen? Hebbt wi us mit usen Naber vertürnt, uk wenn’t nich nödig dahn harr? Wo kunn de Keerl denn meenen, ik wull blot mienen Vördeel bi denn Hannel hebben?

Dor kunnst noch’n ganz Reeg anner Biespille finnen, wenn du över nadenken deist! Ik wull darmit blot seggen, dat wi uk mal bi us sülms nafragen schullen, wenn den Arger givt in’ne Familien of inne Naberschup of in’n Vereen, of inne Gemeen  un wieter bit boben , wo de Lü dat Seggen hebbt un över us bestimmen dot.

An disse Stee kummt us de Gedanken, dat de Freeden inne Welt uk blot up disse Art un Wies sloten weern kann. Wat will ik damit seggen? Hebb ik allens recht un goot makt? Hebb ik een gootet Geweeten bi mien Doon?  Blot up disse Wies kann  uppe Duur dat verdreegliche Leven twüschen de Minschen  bestohn blieven.

 

Leewe Lü hier in Connefoor un rundumto, Ji sett  siet veele Johren een Teeken daför, dat de Minschen an dissen Dag, an den de Sünnen na ehren höchsten Punkt henkamen is, to Besinnung kamt un den Oogenblick fiern dot un glieks dör dat Füürrad, dat  denn Heinenbarg dal lopen deit,  seggen wöt, dat wi us na disse moie Sömmertiet un de tokamen Winterdag  up een nee Sömmertiet woller freuen könnt. Dat Füürrad is een Teeken för de Sünn, de in’n Jahresloop dör den Himmel rullt.

Siet een paar dusend Jaohren is disse Bruuk in us Kultur överlevert un 1920 is dat eersde Mal een Sünnwendfüür up den Heinenbarg afbrennt wurn. De Mannslü un Fronslü van Connefoor hebbt sik daför insett, dat disse ole Bruuk bestahn blivt un so sünd wi an dissen Avend hier woller all tohoopkamen  un laat dat grode Füürrad den Barg dal loopen.

Dat Bruukdom vanne disse Sünnwendfiern givt dat to allereerst in use Kuntreis un wieter rup na’n Norden to, wo de Wessel twüschen Sömmer un Winter een grötter Rull speelt at in’n Süden van us Land.

Dat sünd  uk woll de Grünnen daför, dat in wecke Kanten van us Land sik de Lü uk in’ne Wintertiet dropen hebbt un fiert kört för Wiehnachten de Wintersünnwend; man nich blot hier in us Kuntrei, nee, wenn wi na Nörden kieken doot, denn könnt wi um disse Jaohrestiet bold in jedet Dörp of Stadt in Noorwegen, Sweden, Dänmaark of Petersborg in Russland an dissen Dag dat Füür brennen seehn at een Licht, dat Düüsternis un Unfreeden överwinnen schall un deit.

De Minschen freut sik över dat Licht un de Warmde un  spöördt in ehr Binnerstet, dat de Sünnwenddag een Teeken för den groden Tosammenhalt ünner ehr is. So rekt wi us de Hannen un wööt darmit seggen, dat wi tohoop hören dot. Dat is uk een Teeken för de Länner in Europa, de nich at in ole Tieden mit Krieg gegenanner angungen, ne dat is uk een  Teeken daför, dat wi in tokamen Tieten in Freeden mittenanner leven willt.

 

Un so much ik  mit een Gedicht van Hein Bredendiek sluten:

 

Füür in Middsommernacht

So as se’t vör Uurtieden dan,

mit Mann un Fro in’n Füürkring stahn,

 n’  Minschenmüür üm’t lüchen Mal:

so wölt wi’t hol’n, jahrup, jahrdal.

 

Een brennen Mal in biester Tied,

mank Larm,Unfreed’n wiet un siet.

Midsommernacht un lüchen Füür:

bi Noot un Düster n’faste Mür.

 

Nu slu’t den Kring, fat’t an de Handn!

Füür, brenn ut maak toschan’n

All wat scheef un leeg un soor!

Füür, lüch rin in’t goode Jahr !

 

 

© Edzard Pauly,

1.      Vors. OBV Wiefelstede